மேலே உள்ள வரை படத்தில் கிறிஸ்துவின் ராஜ்யம் (கிறிஸ்துவின் சபை) தொடங்கிய நாளில் இருந்து தனது பரலோகம் நோக்கிய பயணத்தைக் கிறிஸ்துவின் உபதேசத்தின் அடிப்படையில் நிகழ்த்துவதை அழுத்தமான நேர்கோட்டு அம்புக்குறி குறிக்கின்றது. தொடக்கத்தில் இருந்து இன்று வரையிலும் கூட கிறிஸ்துவின் உபதேசத்தில் இருந்து வழுவிச்சென்றுள்ள யாவரும் மீண்டுமாக கிறிஸ்துவின் சபைக்குள் சேர்க்கப்பட வேண்டும் என்பதை மேல்நோக்கிய செங்குத்து அம்புக்குறிகள் குறிக்கின்றன.

உலகில் தங்களைக் கிறிஸ்தவர்கள் என்று அழைத்துக் கொள்கிற எந்தக் குழுவும் சபை தோன்றியதற்குப் பின்வந்த ஏதோ ஒரு காலகட்டத்தில் தொடங்கப்பட்டதாகவே உள்ளது. நீங்கள் கூடிவந்து தேவனைத் தொழுதுகொள்ளும் சபையின் போதகரிடத்தில் சென்று உங்கள் சபையின் தொடக்க வரலாற்றை முதலில் அறிந்து கொள்ளுங்கள். பொதுவாக உலகில் உள்ள சபைப்பிரிவுகளுக்கு ஒரு தலைவரும், தலைமையிடமும், அந்தப்பிரிவுக்கென்று மனிதர்களால் நியமிக்கப்பட்ட சட்டதிட்டங்களும் இருக்கும். அவ்வாறு இருந்தது என்றால் அது தேவன் உண்டாக்கிய சபையல்ல என்பதை அறிந்து கொள்ளுங்கள். ஏனெனில் தேவன் சபைக்குத் தலைவராக கிறிஸ்துவையே ஏற்படுத்தினார். தலையாகிய அவருக்குள் நாம் அனைவரும் வளர்ந்து பெருகவேண்டும் என்பதே தேவனுடைய சித்தமாக உள்ளது. ஆதிகிறிஸ்தவர்கள் அப்போஸ்தலருடைய உபதேசத்திலும், அந்நியோந்நியத்திலும், அப்பம் பிட்குதலிலும், ஜெபம்பண்ணுதலிலும் உறுதியாய்த் தரித்திருந்தார்கள் என்று வேதாகமத்தில் நாம் வாசிக்கிறோம். இதே நடைமுறையைப் பின்பற்றி இன்றும் உண்மையான சபையானது தொடர்ந்து ஆவிக்குரிய வகையில் வளர்ந்துகொண்டுதான் உள்ளது.

பிரிந்துபோன ரோமன் கத்தோலிக்கர்களும், கிரேக்க ஆர்த்தொடாக்ஸ்களும், புரொட்டஸ்டண்டு சபையினரும், அதிலிருந்து கிளைத்தெழுந்த பல்வேறு பிரிவினைக் கூட்டங்களும், சமீபகாலமாக முளைத்து எழும்பியுள்ள பெந்தெகொஸ்தேக்களும் இன்னும் மற்ற எல்லாரும் கூட கிறிஸ்துவின் உண்மையான ராஜ்யமாகிய சபையில் சேர்க்கப்பட வேண்டும் என்பதே தேவனுடைய சித்தமாக உள்ளது. இந்த தேவனுடைய சித்தத்தை நிறைவேற்றுவதில் நமது பங்கை நாம் நிறைவேற்றுவோம். எல்லா மக்களும் கிறிஸ்துவின் உண்மையான இராஜ்யமாகிய சபையில் ஒன்றுகூட்டப்பட வேண்டும் என்பதற்காக ஜெபிப்போம். தேவன் நம் எல்லாரையும் ஆசீர்வதிப்பாராக. ஆமென்.